Maextro S800: Rolls-Royce пен Maybach-тан асып түсуге талпынған қытайлық электрлі седан
2025 жылы нарыққа технологиялық алпауыт Huawei мен автокөлік өндіруші JAC компанияларының бірлескен жобасы — Maextro S800 шықты. Бұл F-класс электрлі седаны Rolls-Royce және Maybach секілді танымал брендтермен бәсекелесуге бағытталған. Модель озық технологиялар мен премиум жайлылықты анағұрлым қолжетімді бағамен ұсынады.
Maextro S800 өзінің әсерлі өлшемдерімен таңғалдырады: ұзындығы — 5480 мм, ені — 2000 мм, биіктігі — 1536 мм, ал доңғалақ базасы — 3370 мм. Экстерьерінде Maybach стиліндегі екі түсті бояу және Rolls-Royce моделдерін еске түсіретін жарықдиодты оптика сияқты еуропалық люкс автомобильдерден шабыт алған элементтер бар. Сонымен қатар модель жасырын есік тұтқалары мен фирмалық жарықтық қолтаңба секілді өзіндік ерекшеліктерін сақтаған.
Maextro S800 салоны Nappa былғарысы мен табиғи ағаш арқылы безендірілген. Түнгі аспанды имитациялайтын төбелік жарықтандыру Rolls-Royce модельдерін еске түсіреді. Алдыңғы панельде үш дисплей және алдыңғы әйнекке проекциялау жүйесі орналасқан. Терезелер мен панорамалық төбенің күңгірттену деңгейін реттеуге болады. Электрлі реттеу, жылыту, желдету және массаж функциялары бар орындықтар жайлылықты арттыра түседі. Сонымен қатар төрт аймақты климат-бақылау, 43 динамигі бар аудиожүйе, кіріктірілген тоңазытқыш және биометриялық қолжетімділігі бар сейф қарастырылған.
Maextro S800 екі нұсқада ұсынылады: толық электрлі BEV және жүріс қоры ұлғайтылған EREV. Қуаты 530-дан 864 а.к.-ке дейін жетіп, автомобиль 100 км/сағ-қа 4,3–4,7 секундта үдейді. Жүріс қоры BEV нұсқасында 622–702 км, ал EREV нұсқасында 365–400 км аралығында.
Толық жетек жүйесі, артқы басқарылатын дөңгелектер және бүйірімен қозғалу мүмкіндігі бар «краб режимі» автомобильдің маневрлігін айтарлықтай арттырады.
Maextro S800 үшінші деңгейлі автономды жүргізу жүйесімен жабдықталған. Ол төрт лидарды қоса алғанда, 32 сенсорды пайдаланады. Жүйе жол жағдайын алдын ала болжап, автомобильдің жүріс параметрлерін автоматты түрде түзете алады.
Апат болған жағдайда автомобиль кузовтың орналасуын өзгерту, қауіпсіздік белдіктерін тарту және көмек шақыру сигналын жіберу сияқты қорғаныс шараларын автоматты түрде іске қосады.
Maextro S800 Қытайда алдын ала тапсырыс беруге қолжетімді. Бағасы 708 000-нан 1 018 000 юаньға дейін (шамамен $97 500–$140 000). Жабдықталу деңгейі мен технологияларын ескерсек, бұл модель еуропалық люкс брендтеріне тартымды балама бола алады.
Maextro S800 қытайлық өндірушілердің сән-салтанатты, инновациялық технологияларды және бәсекеге қабілетті бағаны бір автомобильде үйлестіре алатынын көрсетіп, премиум-сегменттегі мойындалған көшбасшыларға лайықты бәсекелестік тудырып отыр.
